На 23 ноември 2022 година, се одржа завршен настан во рамки на проектот „Започни ја промената“ кој обедини околу 100 ученици, наставници и претставници од образовните институции. Со активно учество на младите, се презентираа и прославија достигнувањата и успесите во рамки на проектот и се потенцираше важноста од зајакнување на гласот на младите за позитивни општествени промени.
За време на настанот, претставници од Министерство за образование и наука го претставија документот со насоки за внесување дополнувања во политиките за образование кој беше изработен во рамки на проектот и се осврнаа на важноста од поддржување на младите и нивните идеи.
Со цел да ги презентираат многубројните спроведени активности во нивните училишта, ученици од петте проектни училишта СОУ „Никола Карев“ – Струмица, СОУ „Перо Наков“ – Куманово, ОУ „Браќа Рамиз – Хамид“ – Скопје, СУГС „Браќа Миладиновци“ – Скопје и ОУ „Кузман Јосифовски -Питу“ – Скопје уредија штандови со нивни изработки и објаснија кои активности ги спровеле и какво влијание имале истите за нивната околина.
Во рамки на настанот се одржа и интерактивна работилница за учениците на која тие мапираа проблеми и потенцијални решенија поврзани со тоа што за нив значи идеално училиште. Истите ги презентираа пред присутните и дискутираа како би можеле да се спроведат во училиштата.
Проектот „Започни ја промената“ придонесе кон поттикнување, поддржување и зајакнување на гласот на децата и младите. Преку вклучување на околу 500 ученици во проектните активности, младите добија можност активно да учествуваат во своите локални заедници. Исто така, 100 наставници и претставници од стручните служби ги зајакнаа своите знаења и вештини за поддршка на учениците преку учество на обуки и настани во земјата и во странство.
