Во октомври, Дорис Кун, претставничка од Универзитетот за образование на наставници од Цирих, Швајцарија ја посети нашата држава, со цел следење на дел од активностите во рамки на Проектот PEACOCK – Мир преку соработка, компетенции и знаења.
Таа го посети основното училиште „Кирил и Методиј“ во Тетово каде успешно се реализираа активности за градење на животни вештини на учениците во рамки на програмата Децата и семејствата во образованието – ДИСО. ДИСО има за цел да го поддржи развојот на животните вештини и компетенциите на децата и вклучува активно учество на учениците преку игри и задачи што се интегрираат во наставните содржини.
За време на часовите, гостинката од Швајцарија и претставниците од Бирото за развој на образованието и Македонскиот центар за граѓанско образование имаа можност да ја почувствуваат атмосферата во училница, исполнета со интерес, ентузијазам и радост од страна на учениците при реализација на темите од програмата.
При посетата во училиштето, вклучените наставници добија и примероци од прирачниците за ДИСО и „Личен развој на учениците“, обезбедени преку проектот. Прирачниците се исто така достапни во електронска форма на следниот линк – https://ipe-textbooks.phzh.ch/
Во следниот период, учениците ќе учествуваат во интересни иницијативи и активности преку кои ќе имаат можност да ги зајакнат нивните вештини и компетенции.
Програмата ДИСО се реализира во рамки на проектот PEACOCK – Мир преку соработка, компетенции и знаења, поддржан од Универзитетот за образование на наставници од Цирих, Швајцарија, а во имплементација на МЦГО во партнерство со Бирото за развој на образованието.
