80 наставници по Граѓанско образование од 65 средни стручни училишта учествуваа на четири онлајн обуки за разработка на содржините и наставните методи предвидени во Модул 1 и 2 од ново подготвениот Водич за наставници. Обуките се одржаа во периодот помеѓу 6 и 9 октомври, 2020 година, во рамки на Проектот на УСАИД за меѓуетничка интеграција на младите во образованието, а во соработка со Бирото за развој на образованието и Младински образовен форум. Помеѓу присутните беа наставници, претставници на стручна служба и советници од Бирото за развој на образованието кои подетално дискутираа и се запознаа со модуларните единици.
Преку различни интерактивни методи, беа опфатени насоки и идеи за планирање и реализирање на наставата по предметот Граѓанско образование кој според новата наставна програма, се изучува во прва година во средните стручни училишта. Посебно внимание беше посветено и на обработка на предложените активности во Водичот и нивно спроведување преку учење на далечина. Учесниците на обуката добија можност да ги споделат своите искуства и сугестии во однос на реализацијата на наставната програма по Граѓанско образование. Преку обуката, тие се стекнаа со вештини, знаења и материјали за реализирање на наставата по новата модуларна програма.
Во однос на најзначајни искуства/сознанија стекнати за време на обуките, учесниците издвоија, „Добивме многу појасни инструкции, нови идеи и размислувања околу начините на подготвување на наставните содржини. Најважно е тоа што очекуваме интеракцијата на учениците преку понудените модули и техники да биде поголема и пред сѐ попривлечна за самите ученици. Секое ново вакво искуство е добредојдено особено во вакви изолациски услови кога не можеме со колеги и надлежни служби да се консултираме меѓусебно. Затоа ни се и тоа како потребни ваквите инструкции за подобар и поуспешен професионален настап на нас како наставници”.
Учесниците на обуките дадоа и позитивна повратна информација за подготвените содржини од Модул 1 и 2 од Водичот за наставници по Граѓанско образование. „Одлично изработено, подготвено до ситни детали да може секој ученик да се снајде, а на наставникот му е оставен простор за одредени измени и индивидуален пристап. Прирачникот е уникатно решение во кое се содржани многу драгоцени насоки и упатства за наставникот како во теоретскиот дел така и во насоките за рефлексија и евалуација”.
Во претстојниот период, ваква обука ќе биде реализирана и за останатите три модули од наставната програма за предметот Граѓанско образование во прва година во средните стручни училишта.
Оваа активност е дел од Проектот на УСАИД за меѓуетничка интеграција на младите во образованието, поддржан од Агенцијата за меѓународен развој на Соединетите Американски Држави (УСАИД).
Оваа вест е подготвенa со поддршка на американскиот народ преку Агенцијата на САД за меѓународен развој (УСАИД). Содржината е одговорност на МЦГО и не ги изразува ставовите на Агенцијата на САД за меѓународен развој (УСАИД) или на Владата на Соединетите Американски држави.
