Од 27 до 29 јуни, 2022 година, во центарот Солферино, Струга се одржа летен камп поддржан од Проектот на УСАИД за меѓуетничка интеграција на младите во образованието, во соработка со Црвен Крст на Град Скопје и Рома Рок Скул (Roma Rock School) од Скопје. На кампот учествуваа 30 ученици од различни етнички заедници и организации меѓу кои беа ученици од средните училишта „Браќа Миладиновци“ и „Владо Тасевски“ од Скопје, ученици – членови на организацијата Рома Рок Скул како и волонтери на Црвен Крст.
Целта на младинскиот камп беше да се обезбеди креативен и забавен простор за градење на долготрајни врски помеѓу учениците од различни етнички заедници преку заедничко дружење и учество во разновидни активности и проекти.
Преку забавни игри и вежби, младите се запознаваа подобро и учеа едни за други. Тие беа дел од групни дискусии и креативни, интерактивни работилници преку кои учеа за теми како музика, општествени вредности, култури, волонтерство, младински активизам и слично.
„Искуството беше супер. Ова ми беше прв камп и прв пат ми беше да се здружам со луѓе од други етнички заедници. Научив неколку реченици на албански и на ромски јазик и повеќе се запознав со нивните култури“, вели една од ученичките.
Во рамки на заедничките активности, тие играа и пееја заедно во духот на меѓуетничката интеграција. За да се поттикне поголема соработка и комуникација меѓу учесниците, во секоја активност учествуваа различни групи на ученици кои разменуваа искуства и мислења.
„Многу работи научив. Научив повеќе за волонтерството и некои зборови на другите наставни јазици. Иако на почетокот се двоумев, мило ми е што дојдов. Не погрешив“, додава ученик – учесник во активностите.
На големо задоволство на учесниците, им се придружи и младиот уметник Young Dadi, кој го збогати кампот со уште повеќе музика и забава и придонесе за развивање на креативноста на младите. За време на кампот, младите имаа и можност да напишат, отсвират и снимат песна која ќе остане како нивен заеднички труд и спомен за убавото поминато време и меѓусебно дружење.
Оваа активност е дел од Проектот на УСАИД за меѓуетничка интеграција на младите во образованието, поддржан од Агенцијата за меѓународен развој на Соединетите Американски Држави (УСАИД).
Оваа вест е подготвенa со поддршка на американскиот народ преку Агенцијата на САД за меѓународен развој (УСАИД). Содржината е одговорност на МЦГО и не ги изразува ставовите на Агенцијата на САД за меѓународен развој (УСАИД) или на Владата на Соединетите Американски држави.
